CBN Ta Ce Cire Rubutun Larabci Da Buga ₦2,000 Da ₦5,000

 Babban bankin Najeriya wato CBN ta magantu game da bayyanan da ake ta yaɗata game da cire rubutun larabci (Ajami), da ku buga takardar ƙudi na Naira ₦2,000 Da ₦5,000

A ci gaba da shirin sake fasalin wasu takardun ƙudi, wasu ‘yan Najeriya musamman a shafukan sada zumunta sun yi ta rade-radin cewa babban bankin zai buga takardar ƙudi ta Naira dubu biyu (₦2,000) da kuma Naira dubu biyar (₦5,000).

Babban bankin Najeriya, CBN, ta musanta wani shiri da ake yi na buga takardun ƙudi na Naira dubu biyu (₦2,000) da kuma Naira dubu biyar (₦5,000) a ƙasar.  

Sai dai Daraktan Ayyuka na ƙudi na CBN, Ahmed Bello-Umar, yayin wata tattaunawa da Sashen Hausa na Muryar Amurka a ranar Litinin, ya jaddada cewa har yanzu babbar takardar ƙudin a Najeriya shine Naira dubu ɗaya ₦1,000. 

Yayin da yake kira ga ƴan Najeriya da su yi hattara da ƴan damfara da dillalan labaran karya, Mista Umar ya ce duk wanda aka kama da takardun ƙudi na bogi ya kamata a kai rahoto ga jami’an tsaro. 

Ya kara da cewa babu kamshin gaskiya game da buga takardar ƙudi da sama da Naira dubu ɗaya (₦1,000), don haka, babu wani abu kamar ₦2,000, ₦5,000, ko kuma ₦ 10,000 kamar yadda ake yadawa.

Mafi girman darajar Naira har yanzu ₦1000 ne. Kuma a yanzu, babu wani dalili ko shirin ƙarawa.

Ya kamata mutane su yi taka tsantsan don kada ƴan damfara su ruɗe su. A gaskiya, idan wani ya zo maka da irin wannan kudin na jabu, muna ba mutane shawara su kai rahoto ga hukumomin tsaro. 

Da yake magana kan cece-kucen da ake yi kan rubutun Larabci (Ajami) a kan ƙudin Naira, Mista Umar ya yi kira ga ƴan Najeriya da su kwantar da hankalinsu, yana mai cewa hukumar CBN ba za ta dauki duk wani mataki da zai yi watsi da bukatun jama’a ba. 

Muna sane da cewa wasu sun garzaya kotu; wasu na cewa a cire shi, wani bangaren kuma na cewa kada a cire shi. Amma ina so in yi kira ga kowa da kowa ya nutsu.

Hukumomin CBN da ma shugaban ƙasa ba za su dauki matakin da zai haifar da tarzoma tsakanin al’umma ba. Ya kamata kowa ya nutsu, babu wannan magana ta cire rubutun larabci (Ajami) a jikin ƙudadan da za'a sabunta, in ji shi. 

Dangane da matakin wayar da kan jama’a game da sake fasalin kudin Naira, musamman a yankunan karkara, Mista Umar ya ce CBN za ta gudanar da wani gagarumin gangamin wayar da kan jama’a da zarar shugaban ƙasa ya kaddamar da sabbin takardun ƙudi na Naira.

Al-Hudahuda 24/7: Muryar Talaka/Kafar Al'umma